NË SHËN MITËR KORONE, NË KALABRI, PËRFUNDOI FESTIVALI MADHËSHTOR - I NJËZETI - I KËNGËS ARBËRESHE

GRUPI I SHKËLQYESHËM «VUXHET ARBËRESHE», ME KËNGËN «DONJA SE KJO KËNGË...» FITUES I FESTIVALIT

	Autor të tekstit të këngës fituese janë: Adriana Ponte, Vicky Macrì e Gina Rotondaro, kurse autor i muzikës - Aleksandër Paloli.
	Çmimi i dytë i takoi kantautorit gjashtëmbëdhjetëvjeçar, shqiptarit - Egert Pano, për këngën «Jam këtu», kurse kënga e Cristiano Iacovelli-t «Ndën një qilli me yllës» interpretuar nga «Çifti Arbëresh» u nderua me çmimin e tretë.
	Festivali madhështor dhe interpretimi mjeshtëror i këngëve të bukura kënaqi publikun spektakular që mbase kishte kaluar dhjetëmijëshin.
	Me plot emocione, në Shën Mitër kishin mbërritur mijëra arbëreshë, nga të gjitha vendbanimet arbërore.
	Festivalin e kanë përcjellur edhe shumë shqiptarë - pjesëtarë të Mërgatës së Re dhe shumë italianë të vendbanimeve përreth.
	Ishte i pranishëm edhe delegacioni i Lidhjes Shqiptare në Itali, që përshëndeti publikisht Festivalin, në emër të Lidhjes Shqiptare në Botë.
	U hodh ideja për organizimin e shfaqjeve të Festivalit të Këngës Arbëreshe në Kosovë.
	Organizatorët e Festivalit falënderuan publikisht Radiotelevizionin e Kosovës dhe Gazetën Kombëtare «Bota Sot», për përkushtimin e vëmendjes për të mbërriturat madhështore të Mrekullisë Arbëreshe.

I dërguari i posaçëm: ENGJËLL KOLIQI

Shën Mitër Korone - Kalabri, 20 gusht 2001 (Bota Sot - QIKSH Albeuropa)

Festivali i XX-të i Këngës Arbëreshe, u realizua mbrëmë në mënyrë shumë madhështore dhe të mrekullueshme, në Shën Mitër Korone (Rrethi i Kozencës - Kalabri). Spektakli i mrekullueshëm që filloi rreth orës 21 e që zgjati deri në orët e pasmesnatës, kënaqi plotësisht mijëra arbëreshë (fëmijë, pleq e të rinj, burra e gra) të ardhur këtu nga të gjitha vendbanimet arbërore - nga mbarë Arbëria). Bashkë me vëllezërit arbëreshë gëzuan (kënduan e vallëzuan) edhe dhjetëra shqiptarë, të ardhur nga vise të ndryshme të Italisë. Ishin të shumtë edhe arbëreshët të cilët jetojnë e punojnë nëpër krahina të ndryshme të Italisë, por edhe në vende të ndryshme t Europës e më gjërë, që këto ditë kishin marrë pushimet e merituara verore dhwe kishin ardhur këtu, për t'u kënaqur me farefisin e tyre arbëror dhe me shumë manifestime kulturore arbërore të traditës sonë të lavdishme. Shumë nga ata pushimet i lidguin gjithnjë me Festivalin e Këngës Arbëreshe.

Përveç jurisë profesionale-teknike të Festivalit, ishte edhe Juria Popullore, e përbërë nga dhjetëra personalitete arbëreshe - të jetës shoqërore, arsimore, fetare, kulturore, artistike... - të ardhur nga të gjitha vendbanimet e Arbërisë. Këtë vit Juria nuk e kishte lehtë, sepse të gjitha këngët ishin zgjedhur me një përkushtueshmëri të lartë profesionale-artistike dhe janë këndaur aq bukur, saqë ishte vështirë të thuhet se kjo këngë nuk meriton të shpërblehet, apo kjo tjetra ishte shumë më e mirë se kjo. Megjithatë - ndër këngët e mira, prapëseprapë u dasht të zgjidhen ato më të mira, që kësar radhe u radhiten më sa vijon:

1. DONJA SE KJO KËNGË...

teksti: Adriana Ponte, Vicki Makrì (Vicky Macrì) dhe Gjina (Gina) Rotondaro

muzika: Aleksandër Paloli

kënduar nga Grupi «VUXHET ARBËRESHE»

2. JAM KËTU

teksti e muzika: Egert Pano (gjashtëmbëdhjetë vjeç - i biri i Pirro Pano-s)

kënduar nga EGERT PANO

3. NDËN NJË QILLI ME YLLËS

teksti e muzika: Kristian Jakovelli (Cristiano Iacovelli)

kënduar nga Grupi «ÇIFTI ARBËRESH»

Me çmimin e posaçëm të kritikës së themeluesit të Festivalit - Zef D'Amiko (Giuseppe D'Amico) u nderua Fabricia (Fabrizia) Dragone, si autore e muzikës dhe interpretuese e këngës: NJË KËNG' E LIRË, me tekstin e autorit: Gjenar (Gennaro) Tavolaro

Rreth orës 21, pasi ishin tubuar rreth dhjetëmijë dashamirës të Këngës Arbëreshe, të ardhur nga të gjitha katundet - anembanë Arbërisë dhe shumë mërgimtarë shqiptarë e miq italianë, Festivali i Këngës Arbëreshe që organizohet nën patronatin e Administratës së Komunës së Shën Mitrit, të asaj të Rrethit të Kozencës dhe të Administratës Krahinore të Kalabrisë, u shpall i hapur dhe - pasi u bënë paraqitjet e përgjithshme, përshëndetjet, përgëzimet e falënderimet - pas vallëzimit të parë (karakteristik e tipik nga Tradita Arbëreshe, filloi kënga e parë - «Një këng' e lirë», me tekst të Gjenar Tavolaro-s, e kishte aranzhuar dhe e interpretoi mrekullueshëm Fabricia Dragone, e cila edhe e fitoi çmimin për kritikë D'Amiko. Secila këngë dukej më e mirë se tjetra dhe secili interpretim emociononte publikun e zjarrtë tej mase. Një hijeshi të mrekullueshme Festivalit i jepnin edhe vallëzimet e fëmijëve dhe të të rinjve, përgatitur nga Mimoza - mjeshtre shqiptare e vallëzimit. Ndërhyrjet e mysafirëve në mes të këngëve konkurruese në garën e Festivalit, freskonin këtë shfaqje madhështore, që mund të quhet edhe spektakël i mrekullueshëm. Sidomos të qëlluara dhe të mrekullueshme ishin ndërhyrjet e drejtorit artistik të Festivalit - Z. Zef Kakoca, i cili - herë këndonte, herë lexonte telegrame urimi të mbërritura nga personalitete të larta të jetës shoqërore-kulturore arbëreshe, herë intervistonte mysafirët e Festivalit, herë... gjithnjë gjente një diçka për ta emocionuar publikun madhështor, i cili meritonte spektakle të mrekullueshme, siç ishte Festivali Jubilar - i njëzeti - i Këngës Arbëreshe.

Sidomos vlen të theksohen emocionet shfrenuese, kur organizatorët e Festivalit, në emër të të gjithë Arbëreshëve, falënderuan Radiotelevizionin e Kosovës dhe Gazetën e përditshme kombëtare «Bota Sot», për kontributin e tyre në pasqyrimin e veprimtarive arbëreshe para opinionit kosovar dhe mbarëshqiptar, si dy media që ndiqen në mbarë botën shqiptare - në të gjitha kontinentet. Emocione shfrenuese, me duartrokitje frenetike kanë shpërthyer edhe me rastin e përshëndetjes së Delegacionit të Lidhjes Shqiptare në Itali, më sa vijon: "Motra Arbëreshe! Vëllezër Arbëreshë! Ju jeni Mrekullia më e madhe e Historisë dhe e Botës Arbërore!!! Ju jeni mrekullia jonë kombëtare shumëshekullore!!! Më lejoni që të ju përgëzoj për Festivalin e Mrekullueshëm të Këngës arbëreshe - në emër të Lidhjes Shqiptare në Botë e të kryetarit Simon Kuzhnini, në emër të LIdhjes Shqiptare në Itali e të koordinatores Vitore Stefa-Leka dhe në emrin tonë - përfaqësues në këtë Festë të Madhe e të Mrekullueshme Arbërore - Nuhish Sallahi, Fadil Zeneli dhe unë - Engjëll Koliqi. Radiotelevizioni i Kosovës po përgatit një skuadër xhiruese për t'i dërguar në Arbëri, për përgatitjeve të një serie emisionesh mbi jetën dhe veprimtarinë e pashterrshme dhe të pavdekshme Arbëreshe. Edhe gazeta jonë kombëtare «Bota Sot» do të botojë seri shkrimesh mbi jetën dhe veprimtarinë e pavdekshme Arbëreshe. Ju falënderoj edhe në emrin e stafit drejtues të këtyre mediave - më të mëdhatë - të Kosovës. Do të bëjmë çmos që ky Festival i Këngës Arbëreshe të shfaqet edhe në qytetet e katundet e Kosovës! (duartrokitje frenetike dhe ovacione të gjata: Kosova-Kosova! E duam Kosovën e Lirë dhe të Pavarur! Arbëria-Kosova! Në Kosovë e n'Arbëri - të gjithë vëllezër jemi - nji! etj). Artistë e këngëtarë Arbëreshë mirupafshim në Kosovë! Rrofshin Arbëreshët dhe Arbëria! Rroftë Shqipëria dhe mbarë Shqiptaria! Zoti e bekoftë mbarë Tokën Arbërore dhe mbarë Shqiptarët, kudo që janë!!!".

Kryetari i Bashkisë së Shën Mitrit - Sen. Çezar Marini (Cesare Marini), drejtori artistik i Festivalit - Zef Kakoca, si dhe drejtues të tjerë të Festivalit e përgjithësisht të jetës kulturore-artistike arbëreshe, bashkë edhe me artistët, e kanë pritur me shumë emocione propozimin e organizimit të shfaqjeve të këtij Festivali, nëpër qendrat e Kosovës.

Sheshi i madh para Kolegjit të Shën Adrianit në Shën Mitër, mbrëmë ishte shesh i të gjithë shqiptarëve të bashkuar. Brënda, në lokalet e Kolegjit, me rastin e Festivalit ishte hapur një ekspozitë historike, ku veç fotografive dhe veprave të personaliteteve të mëdha të Rilindjes Kombëtare, ishin ekzpozuar edhe veshjet kombëtare dhe mjetet tradicionale të punës, duke filluar që nga parmenda. Këtu në këtë kolegj janë shkolluar dhe formuar shumë personalitete arbëreshe-shqiptare, përfshirë edhe të Madhin Jeronim De Rada. Këtu është shkolluar dhe formuar edhe heroi ynë Avni Rrustemi. Këtu edhe sot rrjedh i nxehtë e i pashterrshëm Gjaku i Shprisht, që mba në jetë të përhershme - deri në amshim - Shpirtin e Arbërit!!!